blogg Archive ágúst 2006

ég þurrkaði út öll símanúmer úr GSM símanum - óvart

Ekki spyrja mig hvernig ég fór að þessu en ég var í losti í nokkrar mínútur - þarna voru öll símanúmer og sem ég þarf á að halda og meira til.

Þá mundi ég að ég get sínkróníserað símann og adressubókina í tölvunni. Svo ég gerði það og þurrkaði þar með út - óviljandi - allar upplýsingar í adressubók tölvunnar sem voru sínu ítarlegri en það sem var í símanum; heimilisföng, afmælisdagar og fl. KRÆST, hvað var ég að hugsa! Þegar maður sínkróníserar tölvuna og síman breytast allar þær upplýsingar í fyrra tækinu sem SÍÐAST voru breyttar (eyddar út í þessu tilviki) í seinna tækniu.

Ég leitaði logandi ljósi á gúgúl að því hvernig maður nær í eyddar skrár og svarið var: ekki hægt á Makka, bara taka bakköpp! Ég gerði síðast bakköpp fyrir 3 mánuðum!!!!

Svo allt í einu fattaði ég að það var ekki rétt hjá mér því ég geri sjálvirkt bakköpp á helstu atriðum, einu sinni á dag yfir á netsvæði .Mac sem ég er með í áskrift. Þvílíkur léttir, ekkert mál, bara sækja adressubókina af netinu og sínka svo síman við tölvuna og VOLA allt komið á sinn stað aftur. SJÚKK.

Ég er að segja ykkur það: GERIÐ BAKKÖPP AF TÖLVUNNI - það marg borgar sig.

þriðjudagur, 29. ágúst 2006 17:18

ég elska IKEA

Alveg yndislegt hvað nýji IKEA bæklingurinn hefur komið mér í gott skap og blásið vindi í seglin hjá mér. 


Nú er ég full af eldmóði og tilbúin að halda áfram að taka til og skipuleggja draslið hjá mér. Það er eitthvað annað en í morgun.

laugardagur, 26. ágúst 2006 17:18

mér líður eins og hermanni á morgnanna

Hemann


... vegna fyrirbæris sem kallað er því fáránlega nafni morgunstirðleiki. Það er frekar eins og maður hafi lent undir valltara. Við systur köllum þetta að vera lurkaðar.

Sem betur fer lagast það eftir nokkra klukkutíma. 

laugardagur, 26. ágúst 2006 16:18

bílbelti fyrir hunda

Ég keypti bílbelti fyrir Polka um daginn og er voða montin að hafa hann í því.

Svona meðan hann hefur verið að venjast því hef ég látið það eftir honum að hafa bílrúðuna vel skrúfaða niður svo hann geti staðið í aftursætinu með hausinn úti. Það finnst honum æði. Og mér finnst það ógeðslega fyndið. 

Í dag þegar ég fór á Geirsnef og við rétt kominn inná nesið þá gerði hann sér lítið fyrir og stökk út um gluggann meðan bíllinn var á ferð og hann í bílbeltinu. Ég snar hemlaði og rauk út og átti von á því að hann héngi utaná bílnum. En beltið lá bara niður með hliðinni og undir bílinn. Ég fór í hjartastopp því ég var viss um að ég hefði keyrt yfir hundinn. Ég öskraði á hann og kíki undir bílinn en þá kemur hann töltandi upp frá ánni. Hann hafði einhvern vegin smeygt sér úr beltinu og rokið niður að á (það var líka það sem var svona spennandi - synda, synda).

Ég segi nú bara mikið ofboðslega er vont að bregða svona svakalega.

fimmtudagur, 24. ágúst 2006 17:18

flugeldasýning í bakgarðinum

Mikið var nú snjallt hjá skipuleggjendum menningarnætur að hafa flugeldasýninguna í bakgarðinum hjá mér. 


Með þessu móti er einstaklega stutt fyrir mig að fara. Svo geta gestir m.nætur raðað sér á alla strand lengjuna með þeim árangri að allir sjá vel þetta flotta ljósasjó. Húrra. 

sunnudagur, 20. ágúst 2006 17:18

klipping

Fór í klippingu og litun í gær. Sá atburður er í frásögur færandi því hann á sér einungis stað tvisvar á ári.

Hárgreiðslukonan las mér pistilin um að ég væri að eyðileggja á mér hárið með þessum ódýru sjampóum sem ég þvæði það uppúr. Það myndi taka mig margar vikur að ná kleprunum úr hárinu. Ég var reyndar sjálf búin að taka eftir þessu og hætt að nota þennan viðbjóð og búin að þvo mér tvo daga í röð með einhverju efnahreinsi sjampói. Er búin að henda sjampólagernum sem ég var nýbúin að koma mér upp (Bónus ferðin ógurlega). Búin að kaupa enn dýrari sjampó á hárgreiðslustofunni. Ætli ég verði ekki bara áfram með kleprana í hárinu vegna þess að ég á ekki eftir að tíma að nota þessa munaðarvöru nema endrum og sinnum.

Já það er vandlifað í þessari veröld. Þetta viðkom þó bara hárinu á höfðinu á mér (mínus þau sem vaxa á augabrúnum og augnlokum (og efrivör og nefinu:o( )). 

Lexía lærð: ekki nota Elvital frá L'oreal né Pantane pro-V sjampó.

sunnudagur, 20. ágúst 2006 17:18

Bónus

Ég fór í Bónus og keypti í 4 poka fyrir 17. þúsund krónur!

Ég hef aldrei keypt fyrir svona mikinn pening í matvöruverslun, enda er ég ein í heimili.

Þetta var ekki svona dýrt af því að ég væri að kaupa svona mikið kjöt því ég keypti bara eina pakkningu af lambakjöti á grillið fyrir innan við þúsund krónur. Megnið af því sem ég keypti voru ávextir og grænmeti; tómatar í dós, ólívur, ávaxtasafi, appelsínur, epli, læm, perur, bananar,  klettasalat, gulrætur, vorlaukur, pistasíuhnetur, tómatar og avakató. Það sem var svona dýrt var klósettpapír, sjampó, þvottaefni, ajax, rakvél, rakvélablöð, kalk, lýsi, omega-3 hylki, plastpokar, tannkrem og tannbursti.

Ég veit af fenginni reynslu að þetta hefði kostað talsvert meira ef ég hefði verslað í annarri verslun en mér finnst þetta samt rosalegur peningur.

miðvikudagur, 16. ágúst 2006 17:18

byggingaófriður

Ég ætla nú ekki að segja að  loftpressu dynkirnir sem við Polki vöknum við hvern morgun jafnist eitthvað á við hörmungarnar fyrir botni Miðjarðarhafs. Þar er engu saman að jafna.

Dynkir þessir eru hinsvegar ansi árans þreytandi til lengdar einkum afþví það sér ekki fyrir endann á þeim í bráð. Svo bætir í að verið er að háþrýstiþvo húsið við hliðina og pússa það allt að utan með slípirokk. Þetta gefur af sér hávaða, endalausar málningar flögur sem berast inn um glugga og inní garð í ómældu magni sem og fínpússað sements rykský sem smokrar sér innum minnstu rifur á gluggum og hurðum. Veðrið er þess slags í dag að illt er að hafa alla glugga lokaða. 

Það er líklega bara eitt til ráða: ég fer bara að slá garðinn og bæti við hávaða... en uppsker ilmandi graslykt og fallegri garð.

mánudagur, 14. ágúst 2006 17:18

© Margrét O. Leópoldsdóttir • Klukkuberg 39 • 221 Hafnarfjörður • 551 5831 • 699 5831